About Us

कनान मण्डली, विगतदेखि वर्तमानसम्म

काठमाडौं जिल्लाको नयाँ बानेश्वरको बुद्धनगर, युएन पार्कको छेउमा अवस्थित कनान मण्डलीले पञ्चायती व्यवस्थादेखि बहुदलीय व्यवस्था हुँदै लोकतन्त्रसम्मको एक लामो तथा थुप्रै तीतामीठा अनुभवहरू सङ्गालेको छ। नेपालमा राजतन्त्र र राज्यसत्ता जीवित र सक्रिय भइरहेको समयमा नेपालको मुटु अर्थात् काठमाडौंमा परमेश्वरले उहाँको सुसमाचार र प्रेममय बलिदानको सन्देशद्वारा सुसमाचारीय राज्य स्थापना गर्ने इच्छा प्रकट गर्नुभयो, जसले गर्दा यस देशका नागरिकले पनि उहाँको वचनमा केन्द्रित भएर आत्मामा साँचो स्वतन्त्रता र एकताको आनन्द लिन सके। यद्यपि यो भूमिमा १८ औँ शताब्दीमा नै सुसमाचार प्रचार गरिएको भए तापनि सुसमाचार ल्याउने र अपनाउने व्यक्ति दुवैलाई नै ठूलो घृणाको साथ देश निकाला गरिएको थियो। त्यो समयदेखि झण्डै २०० वर्षसम्म कुनै पनि गैर-नेपालीलाई नेपाल प्रवेश गर्न समेत रोक लगाइएको थियो। तर सारा संसारले यो सानो भूमिको लागि प्रार्थना गरिरहेको थियो। सन् १९५० पश्चात् फेरि गैर-नेपालीले पनि नेपाल भ्रमण गर्न पाउने भएपछि काठमाडौंमा सन् १९६८ (वि.सं. २०२४) मा परमेश्वरका सेवक जे.सी. खानले आफ्नो पाइला काठमाडौंमा राख्नुभयो। उहाँबाट परमेश्वरको प्रेम र उद्धारको प्रबन्धको सुसमाचार सुनेपछि येशू ख्रीष्टमाथि आफ्नो विश्वास राखेर परमेश्वरका जनहरूले लाजिम्पाटमा सङ्गति गर्न सुरु गरे। तर पञ्चायती व्यवस्थाको कठोर सतावट, विश्वासीहरूलाई प्रभुमा डोहोर्याउने गोठालाहरूको अभाव तथा अन्य विभिन्न समस्याहरूका कारण विश्वासीहरू छरपस्ट भए। यसरी सङ्गति निरन्तर गर्न नसक्दा केही वर्ष सङ्गति रोकियो।

पछि सन् १९८० (वि.सं. २०३६) सालतिर एन. बी. शाही आफ्नो कामको सिलसिलामा काठमाडौं आउनुभयो। तब आदम तुलाधर र एन. बी. शाही एउटै घरमा बसी प्रार्थना, सङ्गति गर्दै रहनुभयो। केही समयपछि नन्दलाल परिवार पनि काठमाडौं आउनुभयो। यसरी उहाँहरू तीनै जना एउटै क्यानेडियन प्रोजेक्टमा काम गर्दै सङ्गति पनि गर्न थाल्नुभयो। अनि विश्वासीहरू क्रमशः थपिँदै गए। यसरी सन् १९८० (वि.सं. २०३६) सालदेखि प्रार्थना सेवा, आराधना सेवा लगायत अन्य सेवाकाई सुरु भयो। त्यसको दुई वर्षपछि सन् १९८२ (वि.सं. २०३८) सालमा कालिम्पोङबाट एल. टी. फुडोङ बडाले सत्य रव भाइजीलाई पठाइकन थापागाउँ, नयाँ बानेश्वरमा भाडाको घरमा उहाँद्वारा मेजको सेवा पनि सुरु भयो। पछि नयाँ बानेश्वरको बुद्धनगरमा जग्गा किनीकन आफ्नै सेवाघर निर्माण गरी लामो समयसम्म सेवा-सङ्गति भयो। यसरी विभिन्न आरोह-अवरोहका बीच पनि प्रभुको काम निरन्तर बढ्दै गयो। कनान मण्डलीबाट भक्तपुर, काभ्रे, दोलखा, रामेछाप, धादिङ, नुवाकोट लगायतका जिल्लाहरूका विभिन्न ठाउँहरूमा पनि प्रभुले आफ्नो काम फैलाएर लैजानुभयो। प्रभुले मुक्ति पाउनेहरूलाई मण्डलीमा थप्दै लैजानुभयो। पछि सेवालय सानो भएकाले २०७२ सालको भूकम्पपछि सो सेवाघरको लगभग ३० मिटरको दूरीमा प्रभुले कनान मण्डलीलाई दिनुभएको जग्गामा सेवाघर निर्माण कार्य सुरु गरी २०७५ सालदेखि त्यहीँ नै सम्पूर्ण सेवा-सङ्गतिहरू भइरहेको अवस्था छ। आजको दिनसम्म आइपुग्दा अनेकौँ आन्तरिक तथा बाह्य समस्याहरूबाट मण्डली गुज्रेर जानु परेता पनि परमेश्वरप्रति विश्वासयोग्य हुन, साँचो सुसमाचार र बाइबलीय शिक्षाको रक्षक हुन परमेश्वरले अनुग्रह दिइरहनुभएको छ। यी सबै कुराहरूको श्रेय र महिमा सृष्टिकर्ता परमेश्वरलाई नै जान्छ।