CANAAN PRAYER HOUSE

वर्तमान मण्डलीमा प्रार्थनाको अवस्था

१. परिचय

प्रार्थना ख्रीष्टियन जीवनको अत्यन्तै महत्वपूर्ण पक्ष हो। साँच्चै भन्ने हो भने प्रार्थना विश्वासी जीवनको मेरुदण्ड हो। प्रार्थना परमेश्वरसँग कुराकानी गर्ने एउटा मात्र माध्यम हो। आत्मिक जीवन प्रार्थनाबाटै सुरु हुन्छ र यो क्रम मृत्युञ्जेलसम्मै चलिरहन्छ। प्रार्थनाले हामीलाई परमेश्वरसँग जोड्ने पुलको काम गर्छ। मण्डली प्रार्थनामय हुँदा परमेश्वरको उपस्थितिको अनुभव हुन्छ, आत्मिक वृद्धि भएको महसुस हुन्छ, सबै मण्डलीका सेवाकाइहरू प्रभावकारी बन्छन्, मण्डली आत्मिक एकतामा बलियो भएर उभिन सक्छ र शत्रुको बलियोसँग सामना गर्न सक्छ। तर मण्डली प्रार्थनामा कमजोर हुँदा मण्डलीको एकता कमजोर हुन्छ, शैतान प्रबल हुन्छ र मण्डलीमा आत्मिकता होइन सांसारिकता प्रबल भएर जान्छ।

बाइबलले प्रार्थनालाई मण्डलीको जीवनमा विशेष स्थान दिएको छ। पुरानो करार र नयाँ करार दुवैले प्रार्थनाको भूमिकालाई अग्रस्थानमा राखेका छन्। पुरानो करारमा एनोसको समयदेखि मानिसहरूले परमप्रभुको नाम पुकार्न सुरु गरे भनी लेखिएको छ (उत्पत्ति ४:२६)। बाइबलीय इतिहासमा हेर्ने हो भने प्रार्थनाकै प्रभावस्वरूप ठूला–ठूला आश्चर्यकर्महरू भएका छन्। यरीहोको पर्खाल ढल्नु (यहोशू ६:२०), सूर्य आकाशमण्डलको बीचमा अडिरहनु र एक पूरा दिन अस्ताउन ढिलो हुनु (यहोशू १०:१३), तथा २ इतिहास २० अध्यायमा यहोशापातले कुनै युद्ध नै नलडी आफूभन्दा शक्तिशाली तीनवटा जातिमाथि विजय हासिल गर्नु—यी सबै प्रार्थनाको प्रभाव हुन्।

पुरानो समयका मण्डलीहरू प्रार्थनामा अत्यन्तै शक्तिशाली थिए। उनीहरू एकै मनका भएर दिनरात प्रार्थनामा समय बिताउँथे। त्यसैले त्यस समयका मण्डलीहरूमा आत्मिक जागृति थियो। प्रभुको निम्ति सताइँदा, पिटाइ खाँदा, तरवारको धारमा काटिँदा वा ढुङ्गाले हानिँदा पनि उनीहरूले आनन्द मनाउँथे। यो सबै प्रार्थनाको प्रभावको कारण थियो।

तर वर्तमान मण्डलीको अवस्था त्यस्तो छैन। वर्तमान मण्डलीले प्रार्थनालाई गौण ठानेको छ। प्रार्थनामा पर्याप्त जोड दिइँदैन। प्रार्थना सेवामा विश्वासीहरूको सक्रियता घट्दै गएको छ र धेरै ठाउँमा प्रार्थना केवल औपचारिकतामा सीमित भएको छ। कतिपय मण्डलीहरूले अझै पनि प्रार्थनालाई महत्त्व दिए तापनि धेरैजसो मण्डलीमा प्रार्थनाहीनता र प्रार्थनाप्रतिको उदासीनता गम्भीर समस्या बनेको छ। यस प्रार्थनाहीनताले अन्य धेरै समस्याहरू पनि सिर्जना गरेको छ।

यस अध्ययनको उद्देश्य वर्तमान मण्डलीमा प्रार्थनालाई सही ढङ्गले परिभाषित गर्नु, प्रार्थनाका प्रकारहरूको विषयमा जानकारी गराउनु, प्रार्थनाको महत्त्वलाई विश्लेषण गर्दै उत्साहित गराउनु, प्रार्थनाका अवरोधहरूको विषयमा सचेत गराउनु, वर्तमान मण्डलीमा प्रार्थनाको अवस्थालाई उजागर गर्नु, प्रार्थनामा देखिएका विकृतिहरूलाई प्रस्तुत गर्नु तथा प्रार्थनालाई प्रभावकारी बनाउने उपायहरूको खोजी गर्दै भविष्यमा मण्डलीलाई प्रार्थनामय बनाउन आवश्यक सुझाव प्रस्तुत गर्नु हो। यस अनुसन्धान प्रक्रियामा बाइबलीय दृष्टिकोण, मण्डलीका व्यावहारिक अभ्यास, पुस्तक–पुस्तिकाहरूको अध्ययन, सर्वेक्षण तथा अवलोकनलाई आधार मानिएको छ।

Detail

वर्तमान मण्डलीमा प्रार्थनाको अवस्था